By Napolitudine

di Felice Nicotera

E dduie ‘e nuvembre! Che malinconia
sti lluce ‘ncopp’’e ttombe appriparate..
Nu disco sona ‘a stessa litanìa..
Vide ggente felice e sorridente..

‘O cimitero è ‘a primma ‘e nu tiatro..
‘Na vot’all’anno ognuno se ricorda..
E puntualmente porta nu saluto
all’aneme perdute e po’ se scorda..

Ma che m’arrappresenta chesta farsa?
Se po’ fa pure a meno ‘e certi scene…
Povere muorte..ca p’avè ‘na rosa
s’anna sentì pugnate ‘a ciente spine..

P’onorà ‘e care ca stanno luntane
fede nce vole e no’ parole..
‘O sentimento onesto ca rummane
nu pate a ‘o figlio splenne cchiù do’ sole..

Addora ‘e puesia..E’ devozione
pe’ ccose eterne e pe’ ‘na vita sana..
E st’anema nun trema a sta’ funzione
comme l’accide ‘o tuocco ‘e ‘na campana…

Felice Nicotera, Suonno d’autunno, ed. dell’Ippogrifo, 1986

Gli articoli di “Napolitudine”